ગુજરાતમાં ઓમિક્રોનનો પગપેસારો : જામનગરના વૃદ્ધ પોઝિટિવ

જામનગર/મુંબઈ, તા.૪
કોરોના વાઈરસનો અત્યંત ઝડપથી ફેલાઈ રહેલા ઓમિક્રોન વેરિઅન્ટના કર્ણાટકમાં બે કેસ નોંધાયા પછી શનિવારે વધુ બે રાજ્યો ગુજરાત અને મહારાષ્ટ્રમાં ઓમિક્રોનના એક-એક કેસ નોંધાયા છે. આ સાથે દેશમાં ઓમિક્રોન વેરિઅન્ટના કુલ ચાર કેસ થઈ ગયા છે. ઝીમ્બાબ્વેથી જામનગર આવેલા એક વૃદ્ધ  દર્દીનો રીપોર્ટ ઓમિક્રોન પોઝિટીવ આવતાં સમગ્ર ગુજરાતમાં ઓમિક્રોન વેરિઅન્ટની એન્ટ્રીને સત્તાવાર સ્વીકૃતિ  મળી છે. એ જ રીતે મહારાષ્ટ્રમાં દક્ષિણ આફ્રિકાના કેપટાઉનથી દુબઇ અને દિલ્હી માર્ગે મુંબઇ આવેલો ૩૩ વર્ષીય યુવાન ઓમિક્રોન વેરિઅન્ટથી સંક્રમિત થતાં મહારાષ્ટ્રમાં ઓમિક્રોનનો પહેલો અને દેશમાં ચોથો કેસ નોંધાયો છે. બીજીબાજુ છ રાજ્યોમાં કોરોનાના કેસ અને મૃત્યુઆંક વધતા કેન્દ્ર સરકારે રાજ્યોને કોરોના સંબંધિત નિયમોનો કડકાઈથી અમલ કરવા નિર્દેશ આપ્યા છે.
આફ્રિકન દેશ ઝીમ્બાબ્વેમાંથી ૨૮મી નવેમ્બરે  જામનગર આવેલા ૭૨ વર્ષીય વૃદ્ધમાં કોરોનાના લક્ષણ જોવા મળ્યા હતા. તેમના નમૂના લેવાયા હતા. જિનોમ સિક્વન્સિંગ માટે એક નમૂનો પૂનાની લેબોરેટરીમાં જ્યારે બીજો નમૂનો ગાંધીનગરની લેબોરેટરીમાં મોકલાયો હતો. ગાંધીનગરની લેબોરેટરીમાંથી વૃદ્ધ ઓમિક્રોન વેરિઅન્ટથી સંક્રમિત હોવાનો રિપોર્ટ આવતા આખા રાજ્યમાં તંત્ર દોડતું થઈ ગયું હતું. ઓમિક્રોન સંક્રમિત વૃદ્ધને જામનગરની સરકારી કોવિડ હોસ્પિટલમાં આઈસોલેટ કરવામાં આવ્યા છે. તેમનું સ્વાસ્થ્ય હાલ સ્થિર છે.
ગુજરાતમાં ઓમિક્રોનનો પહેલો કેસ નોંધાતા મુખ્યમંત્રી ભૂપેન્દ્ર પટેલે તાત્કાલિક આરોગ્ય વિભાગની બેઠક બોલાવી હતી અને વૃદ્ધના સંપર્કમાં આવેલા લોકોના ટ્રેસ કરવા નિર્દેશો અપાયા હતા. જામનગર મહાનગરપાલિકા દ્વારા આ દર્દીની સાથે  સંપર્ક આવેલા દસેક જેટલા વ્યક્તીઓના  કોરોનાના રિપોર્ટ નેગેટીવ આવ્યા છે. જેથી રાહતના સમાચાર છે જ્યારે દર્દી ના  પરિવારને હોમ આઇશોલેશનમાં મૂકી દીધો છે. તેમજ દર્દીના મોરકંડારોડ ઉપર આવેલા રહેણાંક વિસ્તારને કન્ટેઈન્ટમેન્ટ ઝોન તરીકે જાહેર કરી તેમના મકાનને 'સિલ'મારી દેવામાં આવ્યું હતું.
જામનગર નિવાસી વૃદ્ધ ઓમિક્રોન વેરિઅન્ટ માટે અતિ જોખમી દેશોમાં સામેલ ઝિમ્બાબ્વેમાંથી ૨૮મી નવેમ્બરે સ્વદેશ પરત ફર્યા હોવાથી તપાસ માટે તેમના જરૂરી નમૂના લેવાયા હતા, અને  પૃથક્કરણ માટે સૌ પ્રથમ ગાંધીનગરની લેબમાં મોકલવામાં આવ્યા હતાં. આજે તેમનો રિપોર્ટ પોઝિટિવ આવ્યો હતો. આ રીપોર્ટ મળતા જ જામનગર સહિત ગુજરાતના આરોગ્ય તંત્રમાં હડકંપ મચી જવા પામ્યો છે.જોકે પૂનાની લેબોરેટરીમાં મોકલવામાં આવેલા રિપોર્ટ ની હજુ રાહ જોવાઇ રહી છે.
કોરોનાની ગાઈડ લાઈન મુજબ આ વિસ્તારમાં આરોગ્ય અને સફાઈ કર્મચારીને પ્રવેશની છૂટ આપવામાં આવી છે. અન્ય કોઈ અહી પ્રવેશે નહી તે માટે પોલીસ હોમગાર્ડનો પહેરો ગોઠવી દેવામાં આવ્યો છે. તેમજ પ્રવેશ પ્રતિબંધિત કરી બેનરો લગાવી આડશો મુકી દેવામાં આવી છે.
સમગ્ર રાજ્ય ના પ્રથમ એવા ૭૨ વર્ષના વૃદ્ધ ઓમિક્રોન પોઝિટિવ દર્દીને સરકારી ડેન્ટલ હોસ્પિટલના આઈસોલેશન વોર્ડમાં અલગથી દાખલ કરાયા છે.અને હાલ તેઓ ની તબિયત સારી છે.તેઓ ઝીમ્બાબ્વે થી વાયા દુબઇ થઈ ને જામનગર આવ્યા હતા. તેઓ અમદાવાદ એરપોર્ટ થી બાય રોડ જામનગર આવ્યા પછી તેમજ જામનગર શહેરમાં જેઓના સંપર્કમાં રહ્યા હતા, તેવા કુલ ૮૪ લોકોને તંત્ર દ્વારા ટ્રેસ કરી લેવામાં આવ્યા છે, અને તમામના સેમ્પલો પણ લેવાયા છે. જો કે અન્ય કોઈ પોઝિટિવ મળ્યા ન હોવાથી તંત્રએ રાહતનો શ્વાસ લીધો છે.
દરમિયાન કર્ણાટક, કેરળ, તામિલનાડુ, જમ્મુ અને કાશ્મીર, ઓડિશા તથા મિઝોરમમાં કોરોનાના કેસ અને મૃત્યુઆંક વધવાથી સ્વાસ્થ્ય મંત્રાલયે તેમને 'ટેસ્ટ-ટ્રેક-ટ્રીટ-રસીકરણ-કોરોના સંબંધિત વર્તણૂક'ની વ્યૂહરચના અપનાવી કોરોનાનો પ્રસાર અટકાવવા અને મૃત્યુનું પ્રમાણ ઘટાડવા નિર્દેશો આપ્યા હતા. આ રાજ્યોમાં કોરોનાના નવા કેસ અને સાપ્તાહિક પોઝિટિવિટી રેટ તેમજ મૃત્યુઆંક વધવાના કારણે કેન્દ્ર સરકારે રાજ્યોને આ ચેતવણી આપી હતી.
સ્વાસ્થ્ય મંત્રાલયે જણાવ્યું હતું કે, દેશમાં શનિવારે કોરોનાના નવા ૮,૬૦૩ કેસ નોંધાયા હતા અને વધુ ૪૧૫નાં મોત થયા હતા. આ સાથે કોરોનાના કુલ કેસ ૩,૪૬,૨૪,૩૬૦ થયા હતા જ્યારે એક્ટિવ કેસ ઘટીને ૯૯,૯૭૪ થયા છે. કુલ મૃત્યુઆંક ૪,૭૦,૫૩૦ થયો છે. દેશમાં અત્યાર સુધીમાં કોરોનાના કુલ ૩,૪૦,૫૩,૮૫૬ દર્દીઓ સાજા થયા છે. વધુમાં આફ્રિકા સહિત 'જોખમી' દેશોમાંથી છેલ્લા કેટલાક સમયમાં ૧૬ હજારથી વધુ પ્રવાસીઓ ભારતમાં આવ્યા છે. એરપોર્ટ પર તેમના આરટી-પીસીઆર ટેસ્ટમાં ૧૮થી વધુ લોકો કોરોનાથી સંક્રમિત હોવાનું જણાયું છે. તેમના સેમ્પલ જિનોમ સિક્વન્સિંગ માટે મોકલી દેવાયા છે.

from Diwali special News - Gujarat Samachar : World's Leading Gujarati Newspaper https://ift.tt/31u8tp1
via IFTTT